လူ့လောကသို့ သက်ရှိတစ်ဦးအဖြစ် မွေးဖွားလာပြီးသည့်နောက် လူတိုင်းလူတိုင်းသည် အသက် ရှည်ရှည်နေရဖို့ မျှော်လင့်ချက် ရှိကြသည်ဟုဆိုလျှင် မှားမည်မထင်ပါ။ အသက်အရွယ် အပိုင်းအခြားအရ ငယ်ရွယ်သူကလည်း ငယ်ရွယ်သူအလျောက်၊ အသက် ကြီးရင့်သူကလည်း ကြီးရင့်သူအလျောက် ကိုယ်စီ ကိုယ်ငှ သက်ရှည်ကျန်းမာခြင်းဟူသော ဆုလာဘ်ကို ပိုင်ဆိုင်လိုကြသည်။ သက်ရှည်ကျန်းမာဖို့အတွက် လိုအပ်ချက်ဟူသမျှကိုလည်း ကျင့်သုံးလိုက်နာနိုင်ရန် ကြိုးပမ်းရှာဖွေလေ့ ရှိကြပါသည်။ ယခုအခါ ကမ္ဘာနှင့် အ၀န်းတွင် သက်ရှည်ကျန်းမာမှုသည် အလေးထားဖွယ်ရာ ဘာသာရပ်တစ်ခုအဖြစ် ထင်ရှားလျက်ရှိသည်။
သက်ရှည်ကျန်းမာဖို့ရာ မည်သည့်အရာတွေက အထောက်အကူ ပြုပါသနည်း။ ခေတ်လူတို့သည် မိမိတို့ ၏ နေထိုင်မှုပုံစံ၊ အလေ့ အထ၊ အစားအသောက်တို့ဖြင့် လူ့သက်တမ်းကို ဆွဲဆန့်နိုင်သည်ဟု သိရှိလက်ခံ ထားကြပြီး ဖြစ်ပါသည်။ ထိုနည်းလမ်းများဖြင့် သက်ရှည်ကျန်းမာခြင်းကို အမှန်တကယ်ပင် ရယူနိုင်ပါသည်။ ရာခိုင်နှုန်းအားဖြင့်ဆိုသော် ၇၀ ရာခိုင်နှုန်းခန့် အောင်မြင်နိုင်ပါသည်ဟု ဆိုလျှင် ဤအဆိုကို လက်ခံနိုင်ကြပါ မည်လား။ ကျန်သည့်ရာခိုင်နှုန်းသည် အဘယ်ကြောင့် အငြင်းပွားဖွယ်ဖြစ်အောင် ကျန်ရှိနေရပါသနည်း။ အကြောင်းရှိပါသည်။
လူတို့သည် နေ့စဉ်နှင့်အမျှ ပြုဖွယ်ဆောင်တာကိစ္စတို့မှာ များပြားလှပေသည်။ လူမှုကိစ္စအ၀၀တို့ဖြင့် နေ့တစ်နေ့ကို အစပြုပြီး၊ ပြေးလွှားလှုပ်ရှားနေရင်းဖြင့်ပင် တစ်နေ့တာ ကုန်ဆုံးသွားရပြန်သည်။ ဤသို့သော နေ့ရက်များစွာကို ကျော်ဖြတ်လာရသည့်အခါ အကြောင်းကိစ္စကိုလိုက်၍ လူတို့၏စိတ်မှာ ပင်ပန်းနွယ်နယ် လာရသည်။ ငြီးငွေ့မှုတွေ ကြုံလာရသည်။ စိတ်အေးချမ်းမှု နည်းပါးလာ ကြသည်။ မနက်မိုးလင်းသည်နှင့် ဆောင်ရွက်စရာအလုပ်များက တန်းစီ၍ စောင့်နေကြသည်။ တစ်ခုကို ပြီးမြောက်အောင် ဆောင်ရွက်ပြီး သည်နှင့် နောက်တစ်ခုက အဆင်သင့် စောင့်ကြိုနေပြန်သည်။ ထိုအခြေအနေမျိုးသည် တစ်ခါတည်းနှင့် ပြီးဆုံးသွားသည်ဟူ၍ မရှိ။ တစ်နေ့ပြီး တစ်နေ့၊ တစ်ရက်ပြီး တစ်ရက်မှသည် အသက်ရှင်နေသမျှ ကာလ ပတ်လုံး အခြေအနေကိုလိုက်၍ အနည်းအများ ရှိနေဦးမည်သာဖြစ်သည်။
အထက်တွင် ဖော်ပြခဲ့သော ကျန်ရှိနေသည့် ၃၀ ရာခိုင်နှုန်းသည် ဆိုခဲ့သော အခြေအနေများပေါ်တွင် တည်မှီနေပါသည်။ အဘယ်ကြောင့်ဆိုသော် လူတစ်ဦးတွင် စိတ်နှင့်ရုပ်ခန္ဓာတို့ မျှတစွာ ရှင်သန်နိုင်ရန် အရေးကြီးသောကြောင့်ပင် ဖြစ်ပါသည်။ ရုပ်ခန္ဓာ၏ ပြုလွယ်ပြင်လွယ်သော သဘောသည် စိတ်ခန္ဓာ၏ ကြိုးကိုင်ထိန်းချုပ်မှုပေါ်တွင် ရာနှုန်းပြည့် မူတည်သည်။ စိတ်ခန္ဓာက တွေးတောကြံစည် စေခိုင်းသမျှကို ရုပ်ခန္ဓာက ပြီးမြောက်အောင် ဆောင်ရွက်ပေးသည်။ လူတို့၏ စိတ်ခန္ဓာတွင် နာမကျန်းဖြစ်လာသည့်အခါ ရုပ်ခန္ဓာအပေါ် တိုက်ရိုက် အကျိုးသက်ရောက်စေတော့သည်။ ထို့ကြောင့်ပင် လူတို့တွင် ရောဂါဘယဟူ၍ ဖြစ်ပေါ် ခံစားလာရတော့သည်။
ဆိုလိုရင်းမှာ သက်ရှည်ကျန်းမာစေဖို့အတွက် အဓိက လိုအပ်ချက်တစ်ရပ်မှာ အကောင်းမြင်တတ်သော စိတ် ထားရှိနိုင်ရန်ပင် ဖြစ်ပါသည်။ အရာရာအပေါ် အကောင်းဘက်က တွေးတောခြင်းဖြင့် မိမိ၏စိတ်ကို ကြည်လင်သန့်စင်စေပါသည်။ အကောင်းမြင်စိတ်ထား ပိုင်ဆိုင်သူတစ်ဦးသည် အခြားသော သက်တူရွယ်တူ လူတစ်ယောက်ထက် ပို၍နုပျိုပြီး အသက်ရှည်ရှည် နေထိုင်နိုင်ကြ သည်။ အကောင်းမြင်စိတ်ကြောင့် သူ့ဘ၀သည် ရှင်သန်နေထိုင်ဖို့ရာ နှစ်သက်ဖွယ်ဖြစ်နေသည်။ သူ့အမြင်တွင် လောကကြီးသည် နရီ စည်းချက်ကျစွာဖြင့် ဖြစ်ပျက်ပြောင်းလဲနေသည်။ လောကဓံတရားသည် သူ၏ အကောင်းမြင်စိတ်ကို မဖျက်ဆီးပစ်နိုင်။ ထိုအခါ အေးချမ်းသော စိတ်အနေသည်ပင် သူ့ဘ၀၏ သက်ရှည်ကျန်းမာဖို့ရာ အကြောင်း တရား ဖြစ်နေတော့သည်။
နိဂုံးချုပ်အားဖြင့်ဆိုသော် လူတို့နေထိုင်ရာ လောကကြီးတွင် အကောင်းမြင်စိတ်တို့ ပိုမိုတိုးပွား ပျံ့နှံ့စေ သင့်သည်။ အကောင်းမြင် စိတ်အပေါ် အခြေခံပြီး လူသားအချင်းချင်း စာနာနားလည်၊ ဖေးကူ လက်တွဲသင့် ကြသည်။ ကမ်းသောလက်နှင့် တွဲသောလက်တို့ ချိတ်ဆက်မိမိ ရှိမှသာလျှင် သက်ရှည်ကျန်းမာသော လူ့ဘောင်လောကကို တည်ဆောက်နိုင်လိမ့်မည်ဟု ယူဆမိပါသည်။
မြ၀တီဇော်
No comments:
Post a Comment