ရင်နှင့် ရင်းသော ချစ်ခြင်းသံစဉ်

စာဖတ်သူများအားလုံး မင်္ဂလာပါရှင်။ အကြောင်းအမျိုးမျိုးကြောင့် ကျွန်မ မြ၀တီဇော်တစ်ယောက် ဘလော့ ရပ်ဝန်းကနေ ခဏပျောက် (အဲ..မှားလို့) အကြာကြီး ပျောက်နေခဲ့ရပါတယ်။ စာအသစ်တွေ မတင်တာ ကြာလို့ စာရေးတဲ့ဝါသနာကို စွန့်လိုက်ပြီလို့တော့ မထင်ကြပါနဲ့နော်။ :) အားလုံးနဲ့ အဆက်ပြတ် သွားခဲ့ရ တာက Depression ၀င်ချင်သလိုလို ဖြစ်ခဲ့ရတဲ့ ကိစ္စတစ်ခုကို ခံစားခဲ့ရတာကြောင့် စိတ်လေလေနဲ့ စာမရေးဖြစ်ခဲ့တာပါ။

ဒီအတောအတွင်းမှာ ကျွန်မ တချို့သော မောင်နှမတွေရဲ့ ဘလော့တွေကို ၀င်ဖတ်မိတာ ရှိသလို မဖတ်မိခဲ့ တဲ့ ဘလော့တွေလည်း ရှိခဲ့ပါတယ်။ အဲဒီအတွက်လည်း မောင်နှမတွေ၊ ညီအစ်မတွေကို တောင်းပန်ချင်ပါ တယ်။ တစ်ခါတလေ စာတွေသာ ၀င်ဖတ်သွားပေမယ့် စိတ်နဲ့လူနဲ့ မကပ်တဲ့အချိန် ဖြစ်နေလို့ ကွန်မန့်တွေ လည်း မပေးဖြစ်ခဲ့ပါဘူး။ စာတွေ ၀င်ရောက် ဖတ်ရှုပြီး တိတ်တဆိတ် ပြန်သွားခဲ့တာတွေ များခဲ့ပါတယ်။ ဒါကြောင့် အခုရက်ပိုင်းမှာတော့ စာကြွေးတွေ တဖြည်းဖြည်းနဲ့ ရှင်းနေရပါတယ်။ :)

ကျွန်မ စိတ်ဓာတ်ကျနေခဲ့ရတဲ့ အကြောင်းအရင်းကို ရင်ဖွင့်ရရင် ကျွန်မဘ၀မှာ ကြိုးစားတိုင်းလည်း မရနိုင် တဲ့အရာဆိုတာ ရှိနေပါသေးလားဆိုတဲ့ အသိကို ကျွန်မ ကြုံတွေ့ခဲ့ရတဲ့ အဖြစ်အပျက်တစ်ခုဆီက သင်ခန်း စာ ရခဲ့လို့ပါ။ ဘယ်သူမဆို နှစ်နဲ့ချီပြီး ကိုယ်တိုင် အပင်ပန်းခံ ကြိုးစားလာခဲ့လို့ ရရှိရမယ့် ရလဒ်တစ်ခုက ရက်ပိုင်းလေးအတွင်းမှာ လက်လွှတ်ခံလိုက်ရမယ်ဆိုရင် အနည်းနဲ့အများတော့ တုန်လှုပ်မိကြမှာပါပဲ။ တစ်နှစ်ပတ်လုံး ကြိုးစားပမ်းစား တည်ဆောက်ခဲ့ရတဲ့ ရည်မှန်းချက်တစ်ခုက နှစ်ရက်တာ အတောအတွင်း မှာ ဘာအကျိုးခံစားခွင့်မှ မရလိုက်ဘဲ အဆုံးရှုံးခံလိုက်ရဖို့ဆိုတာ တခြားသူတွေတော့ မသိပေမယ့် ကျွန်မ အတွက်တော့ အင်မတန်ကို စွန့်စားခဲ့ရတဲ့ ကိစ္စတစ်ခု ဖြစ်ခဲ့ပါတယ်။

အဲဒီလောက် လိုချင်ခဲ့တဲ့ ရလဒ်ကို အဆုံးရှုံးခံရဲဖို့ လုံလောက်တဲ့ အကြောင်းအရင်းကလည်း ကျွန်မ အရူး အမူး မျှော်လင့်ခဲ့ရတဲ့ မိခင်ဘ၀ဆိုတော့ ကျွန်မမှာ ချိန်ခွင်လျှာပေါ် ရပ်နေရတဲ့သူလို တစ်ဖက်ဖက်ကို အလေးသာမှ ဖြစ်မယ့် အခြေအနေမျိုးနဲ့ ရင်ဆိုင်ခဲ့ရပါတယ်။ ကျွန်မ ကြိုးစားခဲ့ရတဲ့ အချိန်တွေ၊ ပင်ပန်းခဲ့ရ တဲ့ ကာလတွေ၊ အောင်မြင်ခဲ့တဲ့ စာမေးပွဲရလဒ်တွေ ဒါတွေအားလုံးဟာ Presentation လုပ်မယ့် အကြိုရက် နဲ့ ပတ်ကားရက် နှစ်ရက်ကို မလာနိုင်ရင် ဘွဲ့မပေးဘူးဆိုတဲ့ စည်းကမ်းချက်ကြောင့် ရေစုန်မျောခဲ့ရပါတယ်။ ကျွန်မ တက်ရောက်တဲ့သင်တန်းမှာ Project နှစ်ခု လုပ်ရပါတယ်။ ပထမတစ်ခုကို အောင်မြင်စွာ ကျော်ဖြတ် ခဲ့သလို ဒုတိယ Project ကိုလည်း ကျွန်မ ပါဝင်တဲ့ Group အတွက် လက်ရှိ အောင်မြင်နေတဲ့ စီးပွားရေး လုပ်ငန်း၊ အဲဒီလုပ်ငန်းနဲ့ ပတ်သက်တဲ့ လုပ်ငန်းလည်ပတ်မှု Data တွေ၊ လိုအပ်တဲ့ အချက်အလက်တွေ ကျွန်မ အားလုံး ပြင်ဆင် ကူညီပေးခဲ့ပါတယ်။

အဲဒီလို ကြိုးစားလာခဲ့ပေမဲ့ ကျွန်မရဲ့ ကျန်းမာရေးအခြေအနေက အိမ်မှာပဲ ငြိမ်ငြိမ်သက်သက် အနားယူဖို့ လိုအပ်တယ်ဆိုတဲ့ ဆရာဝန်ရဲ့ညွှန်ကြားချက်ကြောင့် မတတ်သာဘဲ အိမ်မှာ ကျွန်မ တစ်လလောက် နားနေ ခဲ့ရပါတယ်။ အဲဒီအတောအတွင်းမှာ လူကသာ မသွားမလာရပေမဲ့ Project အတွက် လိုအပ်တဲ့ အချက် အလက်တွေကို အိမ်ကနေပဲ e-mail နဲ့ ပို့ပြီး ကျွန်မအဖွဲ့ဝင်တွေအတွက် ကြိုးစား ကူညီခဲ့ပါတယ်။ ဒါပေမဲ့ ကံတရားက ကျွန်မကို မျက်နှာသာ မပေးခဲ့ပါဘူး။ အိမ်ပေါ်ကနေ အိမ်အောက်ကိုတောင် အတက်အဆင်း မလုပ်ဖို့ ညွှန်ကြားခံထားရတဲ့ ကျွန်မ၊ အိမ်ကနေ ကားနဲ့သွားရင် တစ်နာရီနီးပါး မောင်းရတဲ့ (လိုင်းကား စီးရင် နှစ်နာရီလောက် ကြာတဲ့) ရန်ကုန်တက္ကသိုလ်ရဲ့ လေးထပ် စာသင်ဆောင် အပေါ်ဆုံးထပ်မှာ ပြု လုပ်မယ့် Presentation ကို လာဖို့ ဘယ်လိုမှ အခွင့်အရေး မရခဲ့ပါဘူး။

ဆရာဝန်က "အန္တရာယ်ရှိနိုင်တယ်၊ လုံးဝ မသွားပါနဲ့" ဆိုတဲ့ အကြံပြု တားမြစ်ချက်ကြောင့် ကျွန်မ မျှော်လင့် ချက်တွေ သဲထဲ ရေသွန်သလို အလဟဿ ဖြစ်ခဲ့ရပါတယ်။ ကျောင်းက ကျွန်မရဲ့ ဆရာမတွေကလည်း ကျွန်မကို နှမျောကြလို့ အဲဒီနှစ်ရက်ကို "မျက်နှာပဲ လာပြပါ၊ နာရီဝက်လောက် လာပြီးရင် ကျန်းမာရေး မကောင်းလို့ စောစောပြန်ပါရစေဆိုပြီး ပါမောက္ခတွေကို ခွင့်တိုင်ပေးပါ့မယ်၊ လာဖြစ်အောင်သာ လာပါ" လို့ စေတနာနဲ့ ကူညီကြပေမယ့် ကျွန်မရဲ့ရင်သွေးလေးအတွက် ဘယ်လိုမှ အတိမ်းအစောင်း မခံနိုင်တာမို့ ရည်မှန်းချက်ကို လက်လွှတ်ခဲ့ရပါတယ်။

ကိုယ့်ရည်မှန်းချက် ပန်းတိုင်ကို ရောက်ဖို့ လက်တစ်ကမ်းအလိုကျမှ လက်လွှတ်ခဲ့ရတဲ့ ခံစားချက်ကို ကျွန်မ စာတွေထဲမှာ၊ တချို့သူတွေ ပြောစကားမှာ ကြားဖူး၊ ဖတ်ခဲ့ရဖူးပေမယ့် ကိုယ်တိုင် ကြုံတွေ့လာရတဲ့အခါ မှာတော့ စိတ်ကို ဖြေဖျောက်နိုင်ဖို့ အတော်ကြိုးစားခဲ့ရပါတယ်။ ဒါပေမယ့်လည်း ကျွန်မဘ၀မှာ ဘယ်လောက် အသည်းအသန် ကြိုးစားခဲ့ရတဲ့ ပညာရေးဖြစ်နေပါစေ၊ ကိုယ့်ရင်သွေးနဲ့ ပတ်သက်လာတဲ့ အခါ ဘာမှ အရေးမကြီးတော့တဲ့ ကိစ္စတစ်ခုလို သဘောထားနိုင်ခဲ့တာလည်း မိခင်မေတ္တာဆိုတာကြောင့် များလားလို့ ကိုယ့်ဘာသာ တွေးနေမိပါတယ်။ တကယ်ဆို ကျွန်မက တွေဝေတတ်သူတစ်ယောက်၊ ဆုံးဖြတ်ချက်တစ်ခုကို ချပြီးသွားပြီဆိုရင်လည်း တော်ရုံနဲ့ ပြန်မပြင်တတ်သူတစ်ယောက်၊ (ပြောရမယ်ဆို ရင်တော့ ခေါင်းမာသလို ကိုယ့်ရည်မှန်းချက် မရောက်မချင်း တော်ရုံတန်ရုံနဲ့ လက်မလျှော့တတ်သူပေါ့) အဲဒီလိုလူစားမျိုးဖြစ်တဲ့ ကျွန်မက ကိုယ့်ရင်သွေးနဲ့လည်း ပတ်သက်လာရော ကိုယ့်မှာ ရှိနေတဲ့ ခေါင်းမာ တတ်တာတွေ၊ ဇွတ်တရွတ်နိုင်တာတွေ၊ တွေဝေတတ်တာတွေ စတဲ့ အကျင့်ဆိုးတွေက အလွယ်တကူ ပဲ ပျောက်ကွယ်ကုန်တာတော့ ကိုယ့်ဘာသာကိုယ် အံ့သြမိပါတယ်။

ဘာပဲဖြစ်ဖြစ် ကျွန်မကိုယ်တိုင် မိဘနေရာမှာ ရောက်လာတော့မှ ကိုယ့်မိဘတွေ ကိုယ့်အပေါ် ဘယ်လောက် အနွံတာခံ၊ အနစ်နာခံခဲ့ရရှာမလဲလို့ ကိုယ်ချင်းစာမိခဲ့ရပါတယ်။ မိဘဆိုတာ သားသမီး ကို ဖြူသလား၊ မည်းသလား၊ သားလေးလား၊ သမီးလေးလား မသိရခင်အချိန်ကတည်းက ပေးဆပ် စွန့် လွှတ်ခဲ့ရတာတွေချည်းပါပဲလားလို့လည်း အတွေးဝင်မိပါတယ်။ လောကမှာ ဘယ်လိုမေတ္တာမျိုးကမှ မိဘရဲ့ သားသမီးအပေါ် ထားတဲ့ မေတ္တာကို မနှိုင်းယှဉ်နိုင်ပါဘူးဆိုတာ မိဘနေရာ ရောက်လာတဲ့တစ်နေ့ လူတိုင်း သဘောပေါက် နားလည်လာကြမှာပါ။ အခုအချိန်မှာတော့ ကျွန်မအတွေးထဲမှာ ကိုယ့်သားသမီးအတွက် ကလွဲရင် တခြား အရာတွေအတွက် နေရာမပေးနိုင်သေးပါဘူး။ ဒါကို မိခင်တစ်ယောက်ရဲ့အတ္တလို့ ဆိုချင် လည်း ဆိုနိုင်ပါတယ်။ တကယ်တော့ မိဘတိုင်းက သားသမီးအတွက်ဆိုရင် မာနတွေ ခ၀ါချ၊ အတ္တတွေ ဘေးချိတ်လို့ သားသမီးတစ်မျက်နှာကို တစ်ကမ္ဘာ ထင်ပြီး အသက်ရှင်သန်နေရတဲ့သူတွေပဲ မဟုတ်ပါလား။


(ကိုယ်ပိုင် ခံစားချက်ကို ရင်ဖွင့်လိုက်ရလို့ စိတ်သက်သာသွားပါပြီ။ သည်းခံပြီး ဖတ်ပေးကြသော စာဖတ်သူ များအားလုံးကို ကျေးဇူး အထူးတင်ရှိပါသည်။)

စာဖတ်သူများအားလုံးကို ခင်မင် လေးစားလျက်

မြ၀တီဇော်