ရုန်းမထွက်နိုင်သူ

► ဂရုမစိုက်ခဲ့တာ မဟုတ်ပါဘူး
    ဂရုစိုက်မှုတွေကို လျစ်လျူရှု ခံခဲ့ရတာပါ။

► မာန်တက်နေတာ မဟုတ်ပါဘူး
    မာန်မာနတွေကို မင်းအတွက် ရိုက်ချိုးထားခဲ့တာပါ။

► အငြှိုးအတေးတွေ ကြီးနေတာ မဟုတ်ပါဘူး
    မထွေးနိုင်၊ မအန်နိုင်တဲ့ ခံစားချက်တွေနဲ့
    အသက်ဆက်နေရတာပါ။

► ခံစားချက်တွေ အေးစက်သွားတာ မဟုတ်ပါဘူး
    ခံစားရတာတွေ ရင်နဲ့မဆံ့လွန်းလို့
    နှုတ်ဆိတ်နေတတ်ခဲ့တာပါ။

► အပေးအယူဆန်တာ မဟုတ်ပါဘူး
    တစ်ဖက်သတ် ပေးဆပ်ရတာ များလာတဲ့အခါ
    အတုံ့အပြန်လေးတချို့ကို မျှော်လင့်မိရုံပါ။

► (ဒီလိုနဲ့ ....)
    .................
    .....................
    ................................
    ဘယ်အချိန် ကိုယ့်အပေါ် နားလည်လာနိုင်မလဲဆိုတဲ့
    မရေရာတဲ့ မျှော်လင့်ချက်လေးကို ကိုင်ဆုပ်လို့
    (ခုချိန်ထိ)
    မင်းရဲ့ဘေးက ခေါင်းငုံ့လျှောက်နေဆဲပါ.... ။


♥ မြဝတီဇော် ♥
(23/9/2015)

တန်ဖိုး

မင်းဘဝထဲက တစ်စုံတစ်ယောက်အတွက်
မင်းရဲ့ တန်ဖိုးထားမှုတွေ
အများကြီး ပေးမိခဲ့ရင် ...
သူ့ဘဝထဲက
မင်းအတွက် တန်ဖိုးထားမှုတွေ
ဆုံးရှုံးရလိမ့်မယ်...။

  <3  မြဝတီဇော် <3
(17-8-2015)

ဘဝ နိယာမ

ဘဝက အရွဲ့တိုက်တတ်တယ်

► လူတွေရဲ့ တစ်သက်တာမှာ...
    ပျော်ရွှင်မှုဆိုတာကို သိဖို့
    အရင်ဆုံး ဝမ်းနည်းမှုကို ခံစားစေတယ်...။

► တိတ်ဆိတ်အေးချမ်းခြင်းရဲ့ တန်ဖိုးကို သိဖို့
     ဆူညံပေါက်ကွဲခြင်းကို ကြုံစေတယ် ... ။

► အဲဒီလိုပဲ ...
    တည်ရှိခြင်းရဲ့ တန်ဖိုးကို နားလည်ဖို့
    မရှိခြင်း (မမြဲခြင်း)ကို ဖန်တီးတယ်လေ.... ။

<3  မြဝတီဇော် <3
(17/8/2015)